Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ua lanakila ʻole kekahi pila he 15–9 ma ko Hawaiʻi ʻAha Kenekoa ma ka Pōʻakahi, ka pila hoʻi no ka hoʻonui ʻana i ka nui pakalōlō e kū i ke kānāwai ma mua o ka hoʻopaʻi ʻoʻoleʻa ʻia ʻana. 

ʻO kēia ka lua o ka lanakila ʻole ma ka ʻAhaʻōlelo o kēia kau nei no ka pila i pili i ka ʻāpono ʻana i ka pakalōlō. Ua lanakila ʻole kekahi pila ʻē aʻe ma kinohi o kēia mahina, a pili ua pili lā i ka ʻāpono ʻana i ka puhi pakalōlō no nā kanaka i piha ai ka makahiki 21 a ʻoi aku iā lākou. 

ʻO nā kumu no ke kāpae ʻana iā Senate Bill 2487, ʻo ia hoʻi ka pila kāpae hoʻopaʻi, ua like ia mau kumu no Senate Bill 3335, ʻo ia hoʻi ka pili ʻāpono puhi pakalōlō. Wahi a nā mea kūʻē, e loaʻa ana ka pakalōlō i nā ʻōpio, ʻaʻole e hoihoi ana nā ʻAkia e hele mākaʻikaʻi mai, ʻaʻole e pau ana nā mākeke kū ʻole i ke kānāwai a e nui aʻe ana ka helu o nā ulia kaʻa. 

ʻO ka ʻāpono ʻana i ka pila, nāna e hōʻike mai, “ʻaʻole ʻino kēia lāʻau ʻino i nā keiki a me ke kaiāulu—ʻaʻole nō kā naʻe pēlā,” wahi a Kenekoa Sharon Moriwaki, ka mea e hana nei no ko Waikīkī. “He mea ʻino nō ia i ko kākou ʻoihana nui loa, ʻo ia hoʻi ka hoʻokipa malihini.”

I loko nō o ke kū ʻana i ke kānāwai o ka pakalōlō lapaʻau ma Hawaiʻi nei a me ka hapanui o nā mokuʻāīna, ua ʻōlelo maila ʻo Moriwaki, he mea ʻino ua lāʻau nei i ke olakino o ka lehulehu.  

“Eia hoʻi, ma ka hiki ʻana mai o ka ʻikepili hou, ke aʻo mai nei mākou, ʻoi aku ka nui o ka ʻino o ka pakalōlō i ke olakino lehulehu ma mua o ka paka kikaliki a me ka inu lama ʻana,” wahi āna. Pēlā nō paha, no ka mea, loaʻa i ka pakalōlō o kēia wā ka THC he nui a e hoʻokomo ʻia nā lāʻau ʻino ʻē aʻe i loko, wahi āna. 

Ma ka makahiki 2019, ua kāpae hoʻopaʻi ʻo Hawaiʻi i ka loaʻa ʻana o ka pakalōlō he nui liʻiliʻi. Ma kahi o ka hoʻopaʻi ʻana he 30 lā ma ka hale hoʻopaʻahao a me ka uku hoʻopaʻi he $1,000, hāʻawi ʻia ka uku hoʻopaʻi he $130 i nā kānaka i loaʻa ai ka pakalōlō he 3 kalame, akā, ʻaʻole hoʻokō pinepine ʻia e ke kānāwai. 

Ma SB 2487, inā ua hoʻonui ʻia ka nui pakalōlō e kū i ke kānāwai mai 3 kalame a i 1 ʻaunaki, inā ua hoʻohaʻahaʻa ʻia ka uku hoʻopaʻi i $25. A, ʻo ka puhi pakalōlō ʻana ma kahi lehulehu, he mea e hoʻopaʻi ʻia ma ke ʻano he mea e paipai lāʻau ʻino ma lalo o ke kēkelē ʻakolu. 

Ma ka hōʻike paipai no ka ʻāpono pila ʻana, ua hōʻike mai ka hōʻike a ke kōmike Hale, ʻo ka hoʻopaʻahao ʻana no ka nui liʻiliʻi o ka pakalōlō, “he ʻīpuka laha loa e komo ai ke kanaka i loko o ka ʻōnaehana kalaima.” ʻO ka hoʻololi ʻana i ke kānāwai, he mea e hōʻoia mai i ka hoʻokaʻawale pono ʻana i nā kumu waiwai no nā kalaima lāʻau ʻino nui loa. 

Ua paipai ʻia ʻo SB 2487 e ka Hawaii Public Defender’s Office, ka ACLU of Hawaii, ka Democratic Party of Hawaii a me ka Hawaii Public Health Institute. 

Akā, ua kūʻe ʻia ia pila e ka Attorney General’s Office, ka Honolulu Police Department, a me ka Honolulu Prosecutor’s Office. 

ʻO ka loio hoʻokolokolo ʻo Steve Alm a me kekahi Repubalika o ka Hale ʻo Gene Ward, na lāua pū i kapa aku iā SB 2487 he pila “de facto.” 

Ua ʻāpono ka Hale iā SB 2487 ma ka lā 5 o ʻApelila, akā, ua hōʻole nā lālā he 18 ma kahi o nā lālā he 51. Ua hui pū koke nā mea kūʻē, ma muli nō paha o ka hōʻole ʻia ʻana o SB 3335 e ka Hale. 

“Ua hoʻouna maila ka ʻAha Kenekoa i kekahi pila maikaʻi a kūpono no ka ʻāpono pakalōlō ʻana i ka ʻaha ʻē aʻe,” wahi a Kenekoa Angus McKelvey. Ua wānana mai ʻo ia, hiki i ka pila Hale ke “hoʻopahū” i ka mākeke kū ʻole i ke kānāwai, “a ʻo ka hōʻea maila nō ia o nā pilikia palekana i nānā ʻole ʻia e ka pila maiā mākou.” 

Ua hana ʻia ke koho a ka ʻAha Kenekoa ma mua pono o ka ʻāpono ʻokoʻa ʻana iā Senate Bill 2706, ka mea e hoʻokumu ana i kekahi Clean Slate Expungement Task Force no ke kākau pila ʻana no kekahi polokalamu aupuni no ka holoi ʻana i nā palapala kalaima. Ma ka pila, ʻaʻole i kuhi ʻia nā kalaima pakalōlō, akā, mahuʻi ʻia, e hoʻokomo ʻia ana ia mea ma ka hana a ka hui hana. 

Ua lanakila ʻē ʻo SB 2706 ma ka Hale, a ke hele nei i ke pākaukau o Kiaʻāina Josh Green no kona nānā ʻana aku. 

ʻO kekahi pila holoi kalaima ʻo House Bill 1595, ʻo ia nō ka mea e hoʻokumu i polokalamu pailaka i pili loa i ka pakalōlō. Ua kākau nā mea kākau, ʻike leʻa lākou “i ka ʻino loa o nā palapala hoʻopaʻahao ma luna o ka pono kālā o ke kanaka, a hiki nō i ia mea ke hoʻopilikia i ka loaʻa ʻana o ka hale, ka ʻoihana, a me kekahi laikini ʻoihana.” 

Ua hoʻouna ʻia ʻo HB 1595 i ke kiaʻāina, a ʻo ka lā 25 o Iune ka lā palena pau no kona hōʻike ʻana i kona manaʻo i pili i kēia papahana a me nā papahana like. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.