Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Aia ma kahi huina alanui ke ʻano e mālama ʻia ana ʻo Mauna ʻAla, ka ilina mōʻī Hawaiʻi. 

Ua koho aku ke Keʻena ʻĀina me nā Kumuwaiwai Kūlohelohe i kahu hou no ka pā ilina ma Nuʻuanu me ke kūkākūkā ʻole ʻana me nā hui Hawaiʻi koʻikoʻi a i ʻole ka ʻohana nāna i mālama aku i nā koena no nā makahiki he 200 a ʻoi. 

Civil Beat stories ma ka ʻōlelo Hawaiʻi

‘Ka Ulana Pilina’ is an ongoing collection of news articles and opinion pieces written in the Hawaiian language to better connect with our Indigenous readers, identify underreported stories and improve our engagement with an underserved community.

Read More

ʻO ia ka i hoʻomaka aku i ka hakakā nui ʻana, a e kūkā ʻia ana kēia mea ma ka ʻAhaʻōlelo i kēia makahiki aʻe. E paipai ana nā mea kau kānāwai, e komo ʻole ke keʻena ʻāina aupuni i kēia hana, a e hoʻoili ʻia aku ke kuleana ʻo ka mālama pā ilina ma luna o ke Keʻena Kuleana Hawaiʻi. 

Eia naʻe, ʻo nā mamo a nā kahu kuʻuna — nā mea hoʻi e ʻōlelo aku nei penei, ua ʻaʻe ke keʻena ʻāina i ka loina he mau kekeke no ke koho ʻana i kahu hou — ke hoʻāʻo nei lākou e hoʻopaipai i ka hoʻoili kuleana ʻana ma luna o kekahi hui hoʻopukawaiwaiʻole lehuhelu ʻole. 

ʻO nā ilina i ke kuanaʻike Hawaiʻi — keu hoʻi nā ilina aliʻi — ua kapu nō ia. ʻO ka hakakā ʻana i pili i ke kanaka nona ke kuleana ʻo ka mālama ʻana iā Mauna ʻAla, ua wili ʻia me ke kanaka nona ke kuleana ʻo ka mālama iwi ʻana. 

Ma ka hoʻopaʻapaʻa ʻana, hoʻokahi mea i mōakāka leʻa: ʻaʻole makemake ʻia ke keʻena ʻāina aupuni e mālama iā Mauna ʻAla. 

“ʻAʻole kohu kona noho ʻana ma lalo o DLNR,” wahi a Kenekoa Tim Richards, ka noho luna o ke Kōmike Kenekoa no ke Kuleana Hawaiʻi.

Nui Nā Nīnau I Pane ʻOle ʻIa

Aia nā nīnau he nui i pane ʻole ʻia ma nā pila nāna e paipai i ka hoʻoili ʻia ʻana o ke kuleana, a eia kekahi penei, na wai e uku ana no ka mālama mau ʻana, a e aha ʻia ana ke kahu kūikawā ʻo Doni Chong? 

ʻO Kai Kahele, ka i koho pāloka ʻia aku nei e noho luna ma luna o ka papa kahu waiwai o OHA, ua ʻōlelo akula ʻo ia, ʻo kona keʻena, ka mea i hoʻokumu ʻia no ka mālama ʻana i ka pono o nā Hawaiʻi, ʻo ia nō ka mea kūpono no ka mālama pā ilina ʻana. 

“Ma ʻaneʻi nō ka noʻeau no kēlā hana, he pono nō naʻe ka hana pū ʻana me ka papa luna hoʻokele no ka hoʻokō ʻana,” wahi a Kahele. 

Wahi a Kenekoa Lorraine Inouye, ka noho luna o ke Kōmike Kenekoa No ka Wai me ka ʻĀina, e hāpai ana ʻo ia i pila no ka hoʻoili ʻana i ke kuleana ʻo ka mālama pā ilina ʻana ma luna o OHA. 

Hopohopo ʻo Inouye, inā mau nō ko Mauna ʻAla noho ʻana ma lalo o ke keʻena ʻāina, kahi e loaʻa ai ka luna i koho ʻia e ke kiaʻāina, e loli ana nā kulekele i nā papa luna hoʻokele hou i kēlā me kēia mau makahiki ʻehā. 

“Inā aia ia ʻāina me OHA, ʻaʻole e hoʻololi ʻia ana,” wahi a Inouye. 

I loko nō o ko Inouye kākoʻo ʻana i ka hoʻoili kuleana ʻana, ʻaʻole paʻa kona manaʻo i ka ʻāpono ʻana a nā mea kau kānāwai e hāʻawi iā OHA i kālā hou no Mauna ʻAla. 

Manaʻo ʻo Inouye, hiki i kēlā keʻena ke uku no kēlā me kēia kihi o Mauna ʻAla, ʻoiai, mālama ia keʻena i nā kumu waiwai he $600 miliona. 

Ua maʻa nō ʻo OHA i ka mālama ʻana i nā wahi pana. I ka makahiki 2012, ua loaʻa mai i ia keʻena ka ʻāina ma Wahiawā e noho ai ʻo Kūkaniloko, nā pōhaku hānau o ko Oʻahu mau aliʻi kapu loa. 

Akā, ua kuhi naʻe ʻo Inouye, he mau pilikia ko OHA. Ua hoʻohalahala ʻē ʻia ke keʻena me kona mau kahu waiwai no ka mālama pono ʻole ʻana i ka waihona kālā o ia keʻena. I ʻelua makahiki aku nei, ua hōʻike kekahi hōʻoia moʻokālā i mau hana e loaʻa ai ka hoʻopau kālā, ka hana ʻepa, me ka hana ʻino ʻana ma kā OHA mau palapala ʻaelike i kēlā kekeke i hala aku nei, a ʻo ko ke keʻena hōʻoʻoleʻa akula nō i kona ʻano e mālama mai ai iā ia iho. 

Ma luna aʻe o ka mokuʻāina, ʻo nā Waiwai Noho Kahu o Nā Aliʻi, nona hoʻi ka inoa o nā aliʻi e moe nei ma Mauna ʻAla, na lākou nō i uku no ka hoʻonaninani ʻana i ka ʻāina ma lalo o kekahi palapala ʻaelike me DLNR mai ka makahiki 2013. 

ʻO nā waiwai noho kahu nui loa he ʻekolu — ʻo Lunalilo Home, ʻo Liliʻuokalani Trust me The Queen’s Health System — ʻaʻole lākou i pane i nā nīele hāpai manaʻo no ko Mauna ʻAla hopena e hiki mai ana. 

Ma kekahi ʻōlelo i kākau ʻia, ua ʻōlelo ke Kula ʻo Kamehameha, ʻo ka mālama me ke kiaʻi ʻana iā Mauna ʻAla, “he pono nō ka ʻoi loa o ka hana a nā kānaka a pau i loaʻa ai kēia kuleana kapu loa.” 

“Hilinaʻi mākou, e hana pū ana ʻo OHA me DLNR, me ke kaiāulu, no ka mālama ʻana i kēia ʻāina luaʻole.” 

Ma hope o ko Chong koho ʻia ʻana i kēia makahiki, ua ʻōlelo mai ʻo Dawn Chang, ka luna o DLNR, ua hālāwai pū ʻo ia me nā waiwai noho kahu o nā aliʻi, nā hui aliʻi, nā hui sivila Hawaiʻi a me nā lālā o ka ʻohana kahu kuʻuna, akā, ʻaʻohe o lākou manaʻo kuʻikahi no ka hoʻoili ʻana i ke kuleana no Mauna ʻAla ma luna o OHA. 

I kekahi manawa, ua hāpai ʻia kekahi manaʻo, e hoʻokumu ʻia kekahi kūlana ʻoihana no ka mālama ʻana i nā mea moʻomeheu o Mauna ʻAla. Ua ʻōlelo mai ʻo Chang, ʻaʻohe hoʻi manaʻo kuʻikahi o kēlā mau hui no ke kuleana kikoʻī o ua kūlana ʻoihana ala. 

Ma nā hālāwai papa ʻāina i mālama ʻia aku nei, ua hāpai nā kānaka hōʻike ʻōlelo me nā lālā papa i nā leo hopohopo no ka makemake o ke keʻena ʻāina e hoʻolilo i kekahi mau māhele o Mauna ʻAla i hale hōʻikeʻike, e laʻa ka hale o ke kahu. 

I loko nō o ko ke keʻena mālama ʻana i papahana hoʻonaninani he $325,000 no ka hale o ke kahu, ʻo ka hopena, ʻaʻole nō ia ka hoʻolilo ʻana i pikineki lehulehu, wahi a Chang. Ke pau ka hoʻonaninani ʻana, e mau ana nō ka noho ʻana o nā kahu ma laila, e laʻa ʻo Chong. 

Wahi a Chang, ke hana maikaʻi nei ʻo Chong, a ke kōkua ʻia nei ʻo ia e Kahu Kordell Kekoa no ka hana kuʻuna, a ua hoʻokipa ʻo ia i papa kīnai ahi no Honolulu i hemo kula aku nei.

“ʻAʻole au i lohe iki i leo hopohopo, i leo namunamu hoʻi,” wahi a Chang. “ʻO ia hoʻi, lohe wale ʻia nā leo hoʻomaikaʻi i kāna hana ma laila.”

Ma mua o Chong, ua mālama kuʻuna ʻia ʻo Mauna ʻAla no nā kekeke he nui e kekahi ʻohana me kahi moʻokūʻauhau kahiko i pili i ke aliʻi ʻo Hoʻolulu. Na Hoʻolulu hoʻi me kona kaikuaʻana i hūnā i nā iwi o Kamehameha I. 

He Mana Ko Ka Iwi

I ke kuanaʻike Hawaiʻi, he mana ko ka iwi. I ka wā kahiko, ua hūnā ʻia nā iwi o nā aliʻi kapu loa, e ʻole ke kāʻili mana ʻia ʻana e nā kānaka ʻimi mana. 

Ua hilinaʻi ʻia ʻo Hoʻolulu me kāna mau mamo e kiaʻi i ke koena o nā aliʻi Hawaiʻi a hoʻi lākou i ka pō. 

Ua hoʻokumu ʻia ʻo Mauna ʻAla i ka makahiki 1864 i hale no nā iwi o kā Kamehameha mamo a me kā lākou mau kāhuna. Ma hope, ua lilo ia i wahi e moe ai ka ʻohana o Kāwika Kalākaua me nā moʻokūʻauhau aliʻi ʻē aʻe. 

ʻĀnō, manaʻolana nā mamo, e hoʻokumu ʻia kekahi hui hoʻopukawaiwaiʻole nāna e mālama iā Mauna ʻAla me nā waiwai noho kahu o nā aliʻi — a ʻo ke kāpae akula nō ia i ke kuleana ma luna o ke aupuni mokuʻāina.

“Nui ʻino ka mea politika ma OHA,” wahi a Mary ʻAmaikalani Beckley Lawrence Gallagher, ʻo ia hoʻi kekahi o nā mamo a Hoʻolulu. 

ʻO James Maioho, ʻo ia nō kekahi lālā o kēlā ʻohana, ke hoʻāʻo nei ʻo ia e paipai ʻia e nā waiwai noho kahu o nā aliʻi a me nā hui aliʻi ʻē aʻe no ka hoʻoili kuleana ʻana ma luna o ka hui hoʻopukawaiwaiʻole i mālama ʻia e ka ʻohana. 

“Me hea mea lā, ke hoʻihoʻi ʻia mai nei nā ʻeka he 3.3 i nā Kānaka, ma ke ʻano he ʻāina kūʻokoʻa,” wahi a Maioho. 

Wahi a Gallagher, e kūkākūkā ʻē ana ka ʻohana i ke koho ʻana i kahu hou a me ke kanaka e hoʻomaʻamaʻa ʻia ana no ka hoʻomau ʻana ma hope o ia kanaka mua, ke hoʻihoʻi ʻia ke kuleana ma luna o ka ʻohana. 

Wahi āna, ua ʻalo ka ʻohana i mau hoʻololi aupuni like ʻole, i ka hoʻoili ʻia ʻana o ke kuleana mai ke Aupuni Mōʻī, i ke kelikoli a i ka mokuʻāina. 

“E lana ana nō ko mākou mau ʻauwae,” wahi a Gallagher, “a e komo ʻole ana mākou i ka pikineki keko.”

ʻO kā Civil Beat kūkala nūhou i pili i nā kumuhana Hawaiʻi, ke uku ʻia nei e kekahi haʻawina kālā maiā Abigail Kawānanakoa Foundation. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.